Воведување на ContiRe.Tex

Со технологијата ContiRe.Tex, чија цел е производството, користењето и можноста за рециклирање на пневматиците да станат енергетски поефикасни и еколошки прифатливи, Continental отиде еден чекор поблиску до целта - пневматици направени од 100 % рециклирани или одржливи материјали.

„Tex“ е кратенка за текстил, а во овој случај означува висококвалитетна полиестерска преѓа произведена од рециклирани шишиња од полиетилен терефталат (PET), кои инаку би завршиле во печки за отпад, во океани или на депонии.

Преѓата се произведува механички, без посредни хемиски постапки. Процесот опфаќа рачно вадење на капачињата од шишињата, по што се врши механичко чистење, сечкање и обработка на пластиката во гранулати, кои на крајот се предат во полиестерска преѓа што се користи за производство на нашите одржливи пневматици.

Ние внимаваме PET-шишињата да се собираат исклучително од региони каде што не постои процес на рециклажа во затворен циклус. Во една серија стандардни пневматици за патнички автомобили се користи материјал од 40 рециклирани PET-шишиња (ContiRe.Tex користи од девет до 15 PET-шишиња за еден пневматик, во зависност од големината на пневматикот).